തിരുവനന്തപുരം: യുഡിഎഫിന്റെ ഉജ്ജ്വല വിജയത്തിന് പിന്നാലെ കേരളത്തിന്റെ മുഖ്യമന്ത്രിയെ നിശ്ചയിക്കുന്നതിനുള്ള കോൺഗ്രസ് നിയമസഭാ കക്ഷിയോഗം കെപിസിസി ആസ്ഥാനത്ത് ആരംഭിച്ചു. എഐസിസി നിരീക്ഷകരായ മുകുൾ വാസ്നിക്, അജയ് മാക്കൻ എന്നിവരുടെ സാന്നിധ്യത്തിലാണ് യോഗം ചേരുന്നത്. എന്നാൽ പദവിക്കായുള്ള അവകാശവാദങ്ങളിൽ നിന്ന് പിന്നോട്ടില്ലെന്ന് പ്രമുഖ നേതാക്കൾ വ്യക്തമാക്കിയതോടെ ചർച്ചകൾ വെല്ലുവിളിയാവുകയാണ്.
മുഖ്യമന്ത്രി സ്ഥാനത്തിനായുള്ള മത്സരത്തിൽ നിന്ന് പിന്മാറില്ലെന്ന് തന്നെ അനുകൂലിക്കുന്ന എംഎൽഎമാരോട് കെ.സി. വേണുഗോപാൽ വ്യക്തമാക്കി. 47 എംഎൽഎമാരുടെ പിന്തുണ തനിക്കുണ്ടെന്നാണ് കെ.സി വിഭാഗം അവകാശപ്പെടുന്നത്. വേണുഗോപാലിനെ മുഖ്യമന്ത്രിയാക്കണമെന്ന് ആവശ്യപ്പെട്ട് കെപിസിസി പ്രസിഡന്റ് കെ. സുധാകരൻ നിരീക്ഷകർക്ക് കത്ത് നൽകിയത് കെ.സി ക്യാമ്പിന് വലിയ കരുത്തായിട്ടുണ്ട്.
കേവലം എംഎൽഎമാരുടെ എണ്ണം മാത്രം നോക്കിയല്ല മുഖ്യമന്ത്രിയെ തീരുമാനിക്കേണ്ടതെന്ന് സതീശൻ നിരീക്ഷകരോട് വാദിച്ചു. തിരഞ്ഞെടുപ്പ് വിജയത്തിന് പിന്നിലെ എല്ലാ ഘടകങ്ങളും പൊതുജനതാൽപ്പര്യവും പരിഗണിക്കണമെന്നാണ് സതീശൻ വിഭാഗത്തിന്റെ നിലപാട്. ഒൻപത് എംഎൽഎമാരുടെ ഉറച്ച പിന്തുണയാണ് ഇവർ അവകാശപ്പെടുന്നത്. മുതിർന്ന നേതാവെന്ന നിലയിൽ സീനിയോറിറ്റി പരിഗണിക്കണമെന്നാണ് ചെന്നിത്തലയുടെ ആവശ്യം. 16 എംഎൽഎമാർ തനിക്കൊപ്പം നിൽക്കുമെന്നാണ് അദ്ദേഹത്തിന്റെ പ്രതീക്ഷ.
തിരുവനന്തപുരത്തെ താജ് ഹോട്ടലിൽ തങ്ങിയ നിരീക്ഷകർ പുലർച്ചെ മുതൽ മുതിർന്ന നേതാക്കളുമായി കൂടിക്കാഴ്ച നടത്തി. 63 എംഎൽഎമാരോടും വ്യക്തിപരമായി സംസാരിച്ച് അവരുടെ നിലപാട് നിരീക്ഷകർ തേടും. വൈകുന്നേരം ഘടകകക്ഷി നേതാക്കളുമായും ചർച്ച നടത്തും.
അന്തിമ തീരുമാനമെടുക്കാൻ ഹൈക്കമാൻഡിനെ ചുമതലപ്പെടുത്തിക്കൊണ്ടുള്ള ഔദ്യോഗിക പ്രമേയം നിയമസഭാ കക്ഷിയോഗം പാസാക്കും. നിരീക്ഷകർ ഡൽഹിയിലെത്തി റിപ്പോർട്ട് സമർപ്പിച്ച ശേഷം ഞായറാഴ്ചയോടെ രാഹുൽ ഗാന്ധി മുഖ്യമന്ത്രിയെ പ്രഖ്യാപിക്കുമെന്നാണ് സൂചന. എംഎൽഎമാരെ സ്വാധീനിക്കാൻ മന്ത്രിസ്ഥാനം ഉൾപ്പെടെയുള്ള വാഗ്ദാനങ്ങൾ നൽകുന്നതായും റിപ്പോർട്ടുകളുണ്ട്.