ടെൽ അവീവ്: തെക്കൻ ലെബനനിൽ ക്രിസ്തുപ്രതിമ തകർക്കുന്ന ചിത്രത്തിലുള്ളത് ഇസ്രയേൽ സൈനികൻ തന്നെയാണെന്ന് ഇസ്രയേൽ പ്രതിരോധ സേന ഔദ്യോഗികമായി സ്ഥിരീകരിച്ചു. കഴിഞ്ഞ ദിവസം സാമൂഹിക മാധ്യമങ്ങളിൽ പ്രചരിച്ച ചിത്രം വലിയ ആഗോള പ്രതിഷേധത്തിന് കാരണമായിരുന്നു. ഇതേത്തുടർന്ന് നടത്തിയ ആഭ്യന്തര അന്വേഷണത്തിലാണ് കുറ്റസമ്മതവുമായി സൈന്യം രംഗത്തെത്തിയത്.
സൈനികന്റെ ഈ നടപടി സേനയുടെ മൂല്യങ്ങൾക്ക് വിരുദ്ധമാണെന്ന് ഐ.ഡി.എഫ് പ്രസ്താവനയിൽ വ്യക്തമാക്കി. സംഭവത്തെക്കുറിച്ച് സൈന്യം വിശദീകരണം നൽകിയിരുന്നു. സൈനികന്റെ പെരുമാറ്റം സേനയിൽ നിന്ന് പ്രതീക്ഷിക്കുന്ന അച്ചടക്കത്തിന് നിരക്കാത്തതാണ്. നോർത്തേൺ കമാൻഡ് ഈ സംഭവത്തിൽ വിശദമായ അന്വേഷണം നടത്തിവരികയാണ്. ഇതിന്റെ അടിസ്ഥാനത്തിൽ കുറ്റവാളിക്കെതിരെ കർശന നടപടിയുണ്ടാകും. തകർത്ത പ്രതിമ അതേ സ്ഥാനത്ത് തന്നെ പുനഃസ്ഥാപിക്കാനുള്ള നടപടികൾ ആരംഭിച്ചു കഴിഞ്ഞുവെന്നും സൈന്യം പ്രതികരിച്ചു.
ഹിസ്ബുള്ളയുടെ തീവ്രവാദ കേന്ദ്രങ്ങൾ തകർക്കുക മാത്രമാണ് തങ്ങളുടെ ലക്ഷ്യമെന്നും മതപരമായ ചിഹ്നങ്ങളോ പൊതു സൗകര്യങ്ങളോ തകർക്കാൻ ഉദ്ദേശിച്ചിട്ടില്ലെന്നും ഐ.ഡി.എഫ് കൂട്ടിച്ചേർത്തു. എന്നിരുന്നാലും, മതവികാരം വ്രണപ്പെടുത്തിയ ഈ സംഭവം സൈന്യത്തിന് വലിയ തിരിച്ചടിയായിട്ടുണ്ട്. യുദ്ധത്തിനിടയിലും മതചിഹ്നങ്ങളെ ബഹുമാനിക്കേണ്ടതിന്റെ ആവശ്യകത ഊന്നിപ്പറഞ്ഞ ഇസ്രയേൽ, തെറ്റ് തിരുത്താനുള്ള ശ്രമങ്ങൾ തുടങ്ങിക്കഴിഞ്ഞു.