മലപ്പുറം: സംസ്ഥാനത്തെ ഏറ്റവും കൂടുതൽ ജനസംഖ്യയുള്ള മലപ്പുറം ജില്ല വിഭജിച്ച് പുതിയ ജില്ല രൂപീകരിക്കണമെന്ന ആവശ്യവുമായി മുസ്ലിം യൂത്ത് ലീഗ്. തിരൂരങ്ങാടി ആസ്ഥാനമാക്കി പുതിയ ജില്ല പ്രഖ്യാപിക്കണമെന്ന പ്രമേയം തിരൂരങ്ങാടി മണ്ഡലം മുസ്ലിം യൂത്ത് ലീഗ് പ്രതിനിധി സമ്മേളനത്തിലാണ് അവതരിപ്പിച്ചത്.
തിരൂരങ്ങാടി ആസ്ഥാനമാക്കി പുതിയ ജില്ല രൂപീകരിക്കുക എന്നതാണ് സംഘടന മുന്നോട്ടുവെക്കുന്ന പ്രധാന ആവശ്യം. വലിയ ജനസംഖ്യയുള്ള ജില്ലകളെ ഭരണസൗകര്യത്തിനായി പുനഃസംഘടിപ്പിക്കേണ്ടത് കാലഘട്ടത്തിന്റെ അനിവാര്യതയാണെന്ന് യൂത്ത് ലീഗ് പ്രമേയത്തിൽ ചൂണ്ടിക്കാട്ടുന്നു.
വികസന പ്രവർത്തനങ്ങൾ ജനങ്ങളിലേക്ക് വേഗത്തിൽ എത്തിക്കുന്നതിനും ഭരണപരമായ കാര്യക്ഷമത വർദ്ധിപ്പിക്കുന്നതിനും ജില്ലാ വിഭജനം സഹായിക്കുമെന്നാണ് യൂത്ത് ലീഗിന്റെ നിലപാട്. മലപ്പുറം ജില്ല വിഭജിക്കണമെന്ന ആവശ്യം കാലങ്ങളായി വിവിധ സംഘടനകൾ ഉയർത്തുന്നുണ്ടെങ്കിലും യൂത്ത് ലീഗ് ഈ ആവശ്യം പ്രമേയത്തിലൂടെ വീണ്ടും മുന്നോട്ടുവെച്ചത് രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിതുറന്നിരിക്കുകയാണ്.