കോൺഗ്രസ് എംപിമാർക്ക് നിയമസഭാ സീറ്റ് ഇല്ല; ഹൈക്കമാൻഡ് തീരുമാനം എംപിമാരെ അറിയിച്ചു – കെപിസിസി അധ്യക്ഷ സ്ഥാനം സണ്ണി ജോസഫ് തുടരും

ന്യൂഡൽഹി: കേരള നിയമസഭാ തെരഞ്ഞെടുപ്പിന്റെ സ്ഥാനാർത്ഥി നിർണയ ചർച്ചകൾ തീവ്രമാകുന്നതിനിടെ, കോൺഗ്രസ് ഹൈക്കമാൻഡ് സിറ്റിങ് എംപിമാരെ നിയമസഭാ മത്സരത്തിൽ നിന്ന് പിന്തിരിപ്പിക്കാനുള്ള നീക്കത്തിലാണ്. ഇത്തവണ എംപിമാർക്ക് അസംബ്ലി സീറ്റുകൾ നൽകില്ലെന്നാണ് പാർട്ടി നേതൃത്വത്തിന്റെ വ്യക്തമായ നിലപാട്. ബന്ധപ്പെട്ട എംപിമാരെ ഈ തീരുമാനം അറിയിച്ചതായി സൂചനകളുണ്ട്.കോൺഗ്രസ് 92 സീറ്റുകൾ വരെ മത്സരിക്കാൻ ലക്ഷ്യമിടുന്നതിനിടെ, മുന്നണി ധാരണകളും സീറ്റ് വിഭജനവും അന്തിമഘട്ടത്തിലെത്തിയിരിക്കുകയാണ്. പാർട്ടി തന്ത്രങ്ങളിൽ നിർണായക മാറ്റങ്ങൾ ഉണ്ടാകുന്ന സാഹചര്യത്തിൽ, കെപിസിസി അധ്യക്ഷ സ്ഥാനത്തെ കൈമാറ്റ ചർച്ചകളും സജീവമാണ്.അടുത്ത സിഇസി യോഗം ഇന്ന് ചേരാൻ സാധ്യത കുറവാണ്. കോൺഗ്രസിന്റെ ആദ്യ സ്ഥാനാർത്ഥി പട്ടിക ഇന്നുതന്നെ പ്രഖ്യാപിക്കുമെന്നാണ് പ്രതീക്ഷ. ബാക്കി സീറ്റുകൾ നാളെ പരിഗണിക്കും. കെപിസിസി അധ്യക്ഷന്റെ ചുമതല കൈമാറ്റവും നേതൃയോഗത്തിൽ ചർച്ചയായി. പെരവൂർ മണ്ഡലത്തിൽ കൂടുതൽ ശ്രദ്ധ കേന്ദ്രീകരിക്കേണ്ട സാഹചര്യത്തിൽ, സണ്ണി ജോസഫിന് അധ്യക്ഷ പദവിയും മത്സരവും ഒരേസമയം നിർവഹിക്കുന്നത് ബുദ്ധിമുട്ടാകുമെന്ന വിലയിരുത്തലുണ്ട്. എന്നാൽ, തിരഞ്ഞെടുപ്പ് കാലയളവിൽ അധ്യക്ഷ സ്ഥാനം മാറ്റേണ്ടതില്ലെന്നാണ് ഹൈക്കമാൻഡിന്റെ നിലപാട്. സണ്ണി ജോസഫ് തുടരാനാണ് സാധ്യത കൂടുതൽ.