തിരുവനന്തപുരം: മന്ത്രി കെ.ബി. ഗണേഷ് കുമാറിനെതിരെയുള്ള രാജി ഭീഷണി ഒഴിഞ്ഞു. മന്ത്രിക്കെതിരെ തനിക്ക് പരാതിയില്ലെന്ന് ഭാര്യ ബിന്ദു മേനോൻ വ്യക്തമാക്കി. ഗണേഷ് കുമാർ മാപ്പ് പറഞ്ഞതോടെ പ്രശ്നങ്ങൾ അവസാനിച്ചതായും സർക്കാരിനെ അപകീർത്തിപ്പെടുത്താൻ താനില്ലെന്നും അവർ അറിയിച്ചു. ഇതോടെ കടുത്ത രാഷ്ട്രീയ സമ്മർദ്ദത്തിലായിരുന്ന മന്ത്രിക്ക് വലിയ ആശ്വാസമായിരിക്കുകയാണ്.
ഇന്ന് രാവിലെയാണ് ഗണേഷ് കുമാർ ഭാര്യ ബിന്ദു മേനോനെ ഫോണിൽ വിളിച്ചത്. ഇന്നലെ അദ്ദേഹം തന്റെ സഹോദരിയുമായും സംസാരിച്ചിരുന്നു. താൻ ഭാര്യയോട് ക്ഷമ ചോദിച്ചതായും വ്യക്തിപരമായ പ്രശ്നങ്ങൾ പരിഹരിച്ചതായും മന്ത്രിയും സ്ഥിരീകരിച്ചു. ഭാര്യയുടെ ആരോപണങ്ങൾ പുറത്തുവന്നതോടെ സിപിഐഎം ഉൾപ്പെടെയുള്ള ഘടകകക്ഷികൾ കടുത്ത അതൃപ്തി രേഖപ്പെടുത്തിയിരുന്നു. വിഷയം അതീവ ഗുരുതരമാണെന്ന നിലപാടിലായിരുന്നു ഇടതുമുന്നണി നേതൃത്വം. എന്നാൽ പരാതി പിൻവലിച്ചതോടെ ഗണേഷ് കുമാറിനെതിരെ ഉടൻ നടപടികൾക്ക് സാധ്യതയില്ല.
“വിവാദങ്ങൾ ഇനിയും തുടരരുത്. മന്ത്രി ക്ഷമാപണം നടത്തിയ സാഹചര്യത്തിൽ എനിക്ക് ഇനി പരാതിയില്ല. ഗണേഷ് കുമാറിനെതിരെയോ സർക്കാരിനെതിരെയോ നീങ്ങാൻ താൽപ്പര്യമില്ല.” എന്നാണ് ബിന്ദു മേനോൻ അറിയിച്ചത്.