ടെഹ്റാൻ: യുദ്ധത്തിൽ റഷ്യയും ഇറാനും തമ്മിലുള്ള സൈനിക സഹകരണം ദീർഘകാലമായുള്ളതാണെന്നും അത് ഇപ്പോഴും ശക്തമായി തുടരുന്നുണ്ടെന്നും ഇറാൻ വിദേശകാര്യ മന്ത്രി അബ്ബാസ് അരഗ്ചി. എൻബിസി ന്യൂസിന് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. റഷ്യ പല രീതികളിൽ ഇറാനെ സഹായിക്കുന്നുണ്ട്. ഇതൊരു രഹസ്യമല്ലെന്നും ഭാവിയിലും ഈ സഹകരണം തുടരുമെന്നും അരഗ്ചി പറഞ്ഞു.
കൊല്ലപ്പെട്ട ആയത്തുല്ല അലി ഖമനയിയുടെ മകൻ മോജ്തബ ഖമനയിയെ ഇറാന്റെ പുതിയ പരമോന്നത നേതാവായി ‘അസംബ്ലി ഓഫ് എക്സ്പെർട്സ്’ തിരഞ്ഞെടുത്തു. ഇറാന്റെ ആഭ്യന്തര കാര്യങ്ങളിൽ വിദേശ ഇടപെടൽ അനുവദിക്കില്ലെന്ന് വിദേശകാര്യ മന്ത്രി വ്യക്തമാക്കി. ഇറാനിലെ പുതിയ നേതാവിന് അമേരിക്കയുടെ അംഗീകാരം ആവശ്യമാണെന്ന നിലപാടാണ് നിയുക്ത അമേരിക്കൻ പ്രസിഡന്റ് ഡൊണാൾഡ് ട്രംപ് സ്വീകരിച്ചിരിക്കുന്നത് എന്നും അദ്ദേഹം വ്യക്തമാക്കി.
അതേസമയം, ലെബനനിൽ ഇസ്രയേൽ നടത്തിയ ആക്രമണങ്ങളിൽ 83 കുട്ടികളടക്കം 394 പേർ കൊല്ലപ്പെട്ടു. ഇറാന്റെ എണ്ണ സംഭരണ കേന്ദ്രങ്ങളെ ലക്ഷ്യമിട്ട് അമേരിക്ക-ഇസ്രയേൽ സഖ്യം ആക്രമണം തുടരുകയാണ്. ബുഷ്ഹെർ തുറമുഖ നഗരത്തിലും നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്.