ആലപ്പുഴ: ആലപ്പുഴക്കാരുടെ സ്വപ്നപദ്ധതിയായ പെരുമ്പളം പാലത്തിന്റെ ഉദ്ഘാടന ചടങ്ങിൽ നിന്ന് മുൻ പൊതുമരാമത്ത് മന്ത്രിയും മുതിർന്ന സി.പി.ഐ.എം നേതാവുമായ ജി. സുധാകരൻ വിട്ടുനിൽക്കുന്നു. മന്ത്രി മുഹമ്മദ് റിയാസ് നേരിട്ട് ക്ഷണിച്ചിരുന്നെങ്കിലും ചടങ്ങിൽ അദ്ദേഹം പങ്കെടുക്കുന്നില്ല. ഇതോടൊപ്പം, അദ്ദേഹത്തിന്റെ ഔദ്യോഗിക ഫേസ്ബുക്ക് പേജിൽ പ്രത്യക്ഷപ്പെട്ട ഉദ്ഘാടന ചടങ്ങിന്റെ തത്സമയ സംപ്രേക്ഷണം മിനിറ്റുകൾക്കുള്ളിൽ പിൻവലിച്ചത് ചർച്ചയായിട്ടുണ്ട്.
ജി. സുധാകരന്റെ അനുമതിയില്ലാതെ അഡ്മിൻ ലൈവ് നൽകിയതാണ് ആശയക്കുഴപ്പത്തിന് കാരണമായതെന്നാണ് വിശദീകരണം. സി.പി.ഐ.എം ഡി.സി.സിയിലെ അഡ്മിനാണ് ലൈവ് പങ്കുവെച്ചത്. ജി. സുധാകരന്റെ ഫേസ്ബുക്ക് പേജ് നിയന്ത്രിക്കുന്നത് അദ്ദേഹത്തിന്റെ ഭാര്യയാണ്. ലൈവ് ശ്രദ്ധയിൽപ്പെട്ട ഉടൻ തന്നെ പോസ്റ്റ് നീക്കം ചെയ്തു. ഏകദേശം അരമണിക്കൂറോളം പാലം ഉദ്ഘാടന ദൃശ്യങ്ങൾ പേജിൽ ലൈവായി ഉണ്ടായിരുന്നു.
ജി. സുധാകരൻ ചടങ്ങിൽ പങ്കെടുക്കാത്തത് വ്യക്തിപരമായ കാരണങ്ങളാലോ രാഷ്ട്രീയ വിയോജിപ്പാലോ അല്ലെന്നും, അനാരോഗ്യം കാരണമാണെന്നും സി.പി.ഐ.എം പോളിറ്റ് ബ്യൂറോ അംഗം എം.എ. ബേബി വ്യക്തമാക്കി.