കൊച്ചി: രാഷ്ട്രീയ കോളിളക്കം സൃഷ്ടിച്ച ആദ്യ ബലാത്സംഗക്കേസിലെ അതിജീവിതയെ സോഷ്യൽ മീഡിയയിലൂടെ നിരന്തരം അധിക്ഷേപിച്ചുവെന്ന കേസിൽ പ്രതി ദീപാ ജോസഫിന്റെ ഭാവി ഇന്ന് സുപ്രീം കോടതി തീരുമാനിക്കും. പാലക്കാട് എം.എൽ.എ രാഹുൽ മാങ്കൂട്ടത്തിൽ പ്രതിയായ കേസിനെ ആസ്പദമാക്കി നടന്ന സൈബർ ആക്രമണങ്ങളിൽ രജിസ്റ്റർ ചെയ്ത കേസുകൾ റദ്ദാക്കണമെന്ന് ആവശ്യപ്പെട്ടാണ് ദീപാ ജോസഫ് പരമോന്നത നീതിപീഠത്തെ സമീപിച്ചിരിക്കുന്നത്. ചീഫ് ജസ്റ്റിസ് അധ്യക്ഷനായ ബെഞ്ചാണ് ഇന്ന് ഈ ഹർജി പരിഗണിക്കുന്നത്.
വെറുമൊരു ജാമ്യാപേക്ഷ എന്നതിനപ്പുറം അതീവ ഗൗരവകരമായ ആരോപണങ്ങളാണ് ഈ കേസിൽ ഇപ്പോൾ ഉയർന്നു വന്നിരിക്കുന്നത്. ദീപാ ജോസഫിന്റെ നീക്കങ്ങളെ പ്രതിരോധിക്കാൻ അതിജീവിത നേരിട്ട് തടസ്സഹർജിയുമായി രംഗത്തെത്തിയതോടെ നിയമപോരാട്ടം മുറുകി. തന്നെയും മറ്റ് പരാതിക്കാരെയും സോഷ്യൽ മീഡിയയിലൂടെ ദീപാ ജോസഫ് നിരന്തരം വേട്ടയാടുകയാണെന്നും സമാധാനപരമായ ജീവിതം തകർക്കാൻ ശ്രമിക്കുന്നുവെന്നുമാണ് അതിജീവിതയുടെ പ്രധാന പരാതി.
ഈ നിയമയുദ്ധത്തിൽ ഏറ്റവും ശ്രദ്ധേയമായത് ദീപാ ജോസഫ് സമർപ്പിച്ച സത്യവാങ്മൂലത്തിലെ പൊരുത്തക്കേടുകളാണ്. കോടതിയിൽ സമർപ്പിച്ച വക്കാലത്തും സത്യവാങ്മൂലവും വ്യാജമാണെന്ന ഗുരുതരമായ ആരോപണം പരാതിക്കാരി ഉന്നയിച്ചു കഴിഞ്ഞു. സോഷ്യൽ മീഡിയയിലെ അധിക്ഷേപകരമായ പോസ്റ്റുകളുടെ ഇംഗ്ലീഷ് വിവർത്തനം കോടതിക്ക് മുന്നിൽ എത്തിയപ്പോൾ, അതിന്റെ ഗൗരവം കുറയ്ക്കാൻ ദീപാ ജോസഫ് ബോധപൂർവ്വം വാക്കുകൾ വളച്ചൊടിച്ചുവെന്നും പരാതിക്കാരി ആരോപിക്കുന്നു.
ബലാത്സംഗക്കേസുകളിലെ ഇരകളുടെ സ്വകാര്യതയും അന്തസ്സും സംരക്ഷിക്കാൻ നിയമം അനുശാസിക്കുമ്പോൾ, സോഷ്യൽ മീഡിയയിലൂടെ അവരെ വീണ്ടും അധിക്ഷേപിക്കുന്ന പ്രവണതയ്ക്ക് ഈ കേസ് ഒരു താക്കീതാകും. രാഷ്ട്രീയ ലക്ഷ്യങ്ങൾക്കായി അതിജീവിതമാരെ വേട്ടയാടുന്നത് അംഗീകരിക്കാനാവില്ലെന്ന കർശന നിലപാടിലാണ് പരാതിക്കാരി. സുപ്രീം കോടതിയുടെ ഇന്നത്തെ നിലപാട് സൈബർ ഇടങ്ങളിലെ അതിരുകടന്ന അധിക്ഷേപങ്ങൾക്കെതിരെയുള്ള ശക്തമായ സന്ദേശമാകുമോ എന്നാണ് കേരളം ഉറ്റുനോക്കുന്നത്.