ദീപക്കിന്റെ ആത്മഹത്യ: ഷിംജിതയുടെ ജാമ്യഹർജി പരിഗണിക്കുന്നത് തിങ്കളാഴ്ചത്തേക്ക് മാറ്റി

കോഴിക്കോട്: ഗോവിന്ദപുരം സ്വദേശി ദീപക് ആത്മഹത്യ ചെയ്ത സംഭവത്തിൽ പ്രതിയായ ഷിംജിതയുടെ ജാമ്യാപേക്ഷ പരിഗണിക്കുന്നത് കോഴിക്കോട് ജില്ലാ സെഷൻസ് കോടതി വരും തിങ്കളാഴ്ചത്തേക്ക് മാറ്റി വെച്ചു. കേസുമായി ബന്ധപ്പെട്ട് ഷിംജിതയെ കഴിഞ്ഞ ദിവസം പൊലീസ് വിശദമായി ചോദ്യം ചെയ്തിരുന്നു. ഉന്നത ഉദ്യോഗസ്ഥരുടെ നിർദ്ദേശപ്രകാരം തയ്യാറാക്കിയ പ്രത്യേക ചോദ്യാവലി ഉപയോഗിച്ചായിരുന്നു ഈ നടപടി. ചോദ്യം ചെയ്യലിൽ ലഭിച്ച വിവരങ്ങൾ ഉൾപ്പെടുത്തി പൊലീസ് ഇന്ന് കോടതിയിൽ റിപ്പോർട്ട് സമർപ്പിച്ചിട്ടുണ്ട്.
ദീപക്കിന്റെ മരണത്തിന് പിന്നിൽ ഷിംജിത ഇൻസ്റ്റാഗ്രാമിലൂടെ ഉന്നയിച്ച ആരോപണങ്ങളാണെന്ന് കാണിച്ച് കുടുംബം നൽകിയ പരാതിയെത്തുടർന്നാണ് ഇവരെ ആത്മഹത്യ പ്രേരണാക്കുറ്റം ചുമത്തി അറസ്റ്റ് ചെയ്തത്. പയ്യന്നൂരിലെ ബസ് യാത്രക്കിടെ ദീപക് തന്നെ ലൈംഗികമായി ഉപദ്രവിച്ചു എന്ന് ആരോപിച്ച് ഷിംജിത സോഷ്യൽ മീഡിയയിൽ ഒരു വീഡിയോ പങ്കുവെച്ചിരുന്നു. വെറും ഒരു ദിവസം കൊണ്ട് 23 ലക്ഷം പേരാണ് ഈ വീഡിയോ കണ്ടത്. ആരോപണം വ്യാപകമായി പ്രചരിക്കപ്പെട്ടതിനെത്തുടർന്നാണ് ദീപക് ജീവനൊടുക്കിയത്.
എങ്കിലും, ഷിംജിതയുടെ ആരോപണങ്ങളിൽ കൃത്യമായ തെളിവുകൾ കണ്ടെത്താൻ അന്വേഷണ സംഘത്തിന് ഇതുവരെ സാധിച്ചിട്ടില്ല. സംഭവദിവസത്തെ ബസിലെ സിസിടിവി ദൃശ്യങ്ങൾ പൊലീസ് പരിശോധിച്ചെങ്കിലും നിർണ്ണായകമായ യാതൊന്നും കണ്ടെത്താൻ കഴിഞ്ഞിരുന്നില്ല. കൂടാതെ, യാത്രക്കിടെ ഇത്തരമൊരു സംഭവം നടന്നതായി ആരും പരാതി പറഞ്ഞിട്ടില്ലെന്ന് ബസ് ജീവനക്കാരും മൊഴി നൽകിയിട്ടുണ്ട്. കേസിൽ തിങ്കളാഴ്ച കോടതി കൈക്കൊള്ളുന്ന തീരുമാനം നിർണ്ണായകമാകും.