ഇത്തരം കാര്യങ്ങൾ ആവശ്യപ്പെട്ട് ആരേയും വിളിക്കാൻ ഏൽപ്പിച്ചിട്ടില്ലെന്ന് മന്ത്രിയുടെ ഒാഫിസ് അറിയിച്ചു
കൊച്ചി: പെൻഷൻ നൽകാമെന്നും പകരം തങ്ങളുടെ പാർട്ടിക്ക് വോട്ടും കമ്മിഷനും നൽകണമെന്നാവശ്യപ്പെട്ട് മന്ത്രിയുടെ ഒാഫിസിൽ നിന്നെന്ന പേരിൽ വ്യാജ ഫോൺ കോളുകൾ.വ്യവസായ മന്ത്രി പി.രാജീവിന്റെ ഓഫീസിൽ നിന്നെന്ന് പറഞ്ഞുകൊണ്ടാണ് തട്ടിപ്പ്. സാമൂഹികവും സാമ്പത്തികമായും ഏറ്റവും പിന്നോക്കം നിൽക്കുന്ന സർക്കാരിന്റെ മറ്റൊരു ക്ഷേമ അനുകൂല്യങ്ങളും ലഭിക്കാത്ത ഏറ്റവും പാവപ്പെട്ട അന്ത്യോദയ കാർഡുള്ള 35-60 വയസുളള സ്ത്രീകൾക്ക് സ്ത്രി,ശിശു ക്ഷേമ ബോർഡ് മുഖേന പെൻഷൻ നൽകുമെന്ന് സർക്കാർ പ്രഖ്യാപനം നടത്തിയിരുന്നു. പ്രഖ്യാപനമല്ലാതെ പദ്ധതിയുടെ ഒരു നടപടിക്രമവും സർക്കാർ ഇതുവരെ തുടങ്ങിയിട്ടില്ല.
ഈ പെൻഷന്റെ പേര് പറഞ്ഞാണ് വോട്ടും കമ്മിഷനും ചോദിച്ച് ഫോൺകോളുകളെന്നാണ് പരാതി ഉയർന്നിരിക്കുന്നത്.ആലുവ,കടുങ്ങല്ലൂർ പഞ്ചായത്തിലെ വിവിധ ഭാഗങ്ങളായ കുഞ്ഞുണ്ണിക്കര,ഉളിയന്നൂർ ചെങ്ങമനാട് പഞ്ചായത്തിലെ തുരുത്ത് തുടങ്ങിയ പ്രദേശങ്ങളിലെ സ്ത്രീകൾക്കാണ് പെൻഷൻ വാഗ്ദാനം നൽകി ഫോൺകോളുകൾ വരുന്നത്.
മന്ത്രിയുടെ ഓഫീസ് മുഖേന മാനദണ്ഡങ്ങൾ മറികടന്നും പെൻഷൻ ശരിയാക്കി തരാം എന്നാണ് മന്ത്രിയുടെ ഓഫീസിലെ ഉദ്യോഗസ്ഥനെന്ന് സ്വയം പരിചയപ്പെടുത്തി വിളിക്കുന്ന ഷമീർ എന്നയാൾ 9947790516 ഈ നമ്പറിൽ നിന്നും വിളിക്കുന്നത്.പകരം തങ്ങളുടെ രാഷ്ട്രീയ പാർട്ടിക്ക് വോട്ടും കമ്മിഷനുമാണ് ആവശ്യപ്പെടുന്നത്.
എന്നാൽ മന്ത്രിയുടെ ഓഫീസുമായി നാട്ടുകാർ ബന്ധപ്പെട്ടപ്പോൾ ഇത്തരം വിവരങ്ങൾ ആവശ്യപ്പെട്ട് ആരേയും വിളിക്കാൻ ഏൽപ്പിച്ചിട്ടില്ലെന്നാണ് പറയുന്നത്. പഞ്ചായത്ത് സെക്രട്ടറിയുമായി ബന്ധപ്പെട്ടപ്പോഴും ഈ ഫോൺകോളുകൾ വ്യാജമാണെന്നാണ് അറിയിച്ചത്.തുടർന്ന് വ്യാജ ഫോൺകോൾ സംബന്ധിച്ച് പൊലിസിലും ഇലക്ഷൻകമ്മിഷനും നാട്ടുകാർ പരാതി നൽകിയിട്ടുണ്ട്.വ്യാജ കോൾ സംബന്ധിച്ച് മന്ത്രിയുടെ ഓഫീസുമായി ബന്ധപ്പെട്ടതിന് ശേഷം വിളിച്ച നമ്പറിൽ വീണ്ടും ബന്ധപ്പെടാൻ ശ്രമിക്കുമ്പോൾ ഫോൺ നമ്പർ സ്വിച്ചിഡ് ഓഫാക്കിയിരിക്കുകയാണ്.
അതേസമയം സ്ത്രീ സുരക്ഷ പദ്ധതിയുമായി ബന്ധപ്പെട്ട് വ്യാപകമായി അപേക്ഷ ഫോം വിതരണം ചെയ്തു പൂരിപ്പിച്ചു തിരികെ വാങ്ങുന്നു വെന്ന് പലയിടത്തും നിന്നും പരാതി വരുന്നുണ്ടെന്നും സർക്കാർ ഉത്തരവ് വന്നെങ്കിലും അപേക്ഷ സ്വീകരിക്കുന്നത് സംബന്ധിച്ചു നിർദേശങ്ങൾ ഒന്നും തന്നെ ലഭിച്ചിട്ടില്ലന്നും അതിനാൽ തന്നെ ഇത്തരത്തിൽ അപേക്ഷ കൊടുത്തു പൂരിപ്പിച്ചു വാങ്ങി തുക അനുവദിക്കും എന്ന് പറയുന്നതും പ്രചരിപ്പിക്കുന്നതും തെരഞ്ഞെടുപ്പ് പെരുമാറ്റ ചട്ട ലംഘനമായി കണക്കാക്കുമെന്നും ഈ വിവരം എല്ലാ സെക്രട്ടറിമാരും ബന്ധപ്പെട്ടവരെ അറിയിക്കേണ്ടതാണെന്നും പഞ്ചായത്ത് ജോയിന്റ് ഡയറക്ടർ നിർദേശം നൽകിയിട്ടുണ്ട്.