ഒരു എസ്.ഐ.ആര്‍ അപാരത

കുടുംബ ബന്ധമുപേക്ഷിച്ച് വീട് വിട്ടിറങ്ങിയവർക്കിനി നാട് വിടേണ്ടിയും വരും

അഡ്വ: സി.എ ഹാഷിം ആലുവ

ബീഹാറില്‍ 65 ലക്ഷം പേരെ പുറത്താക്കിയ എസ്.ഐ.ആറിനെപ്പറ്റിയുള്ള കഥകള്‍ കേള്‍ക്കുന്നതിനിടെയാണ് ഈ സാധനം കേരളത്തില്‍ എത്തുന്നത്. നോട്ടു നിരോധനത്തിലൂടെ പ്രജകളുടെ പ്രതികരണ ശേഷി അളന്ന ഭരണക്കാര്‍, നാട്ടുകാരെയും ബി.എല്‍.ഒമാരേയും കലക്ടറേയും വെള്ളം കുടിപ്പിച്ച് എസ്.ഐ.ആറുമായി മുന്നോട്ടു പോവുകയാണ്.
രാജ്യത്തിന്റെ പല ഭാഗത്തും കുഴഞ്ഞു വീണും ആത്മഹത്യ ചെയ്തും ബി.എല്‍.ഒമാര്‍ എത്തിക്കുന്ന എസ്.ഐ.ആര്‍ ഫോം വളരെ ആശങ്കയോടെയാണ് പ്രതീക്ഷിച്ചിരുന്നത്. വാട്‌സ് ആപ്പ് യൂണിവേഴ്‌സിറ്റിയിലെ വിവരം വച്ച് എന്തും നേരിടാന്‍ തയ്യാറായി നില്‍ക്കുമ്പോഴാണ് അപേക്ഷ ഫോം കിട്ടുന്നത്.
ഒറ്റ നോട്ടത്തില്‍ കുറച്ച് ചോദ്യങ്ങളുള്ള ഒറ്റ പേജിലുള്ള മലയാളത്തിലുള്ള അപേക്ഷയാണിത്. ഒരു ബൂത്തിലെ ബി.എല്‍.ഒ പറഞ്ഞു മലയാളത്തില്‍ പൂരിപ്പിച്ചാല്‍ മതിയെന്ന്. മറ്റൊരാള്‍ പറഞ്ഞു ഓണ്‍ലൈനില്‍ അപ്്‌ലോഡ് ചെയ്യാന്‍ ഇഗ്ലീഷില്‍ പുരിപ്പിക്കുന്നതാണ് നല്ലതെന്ന്. 2002 ലെ പട്ടിക പരിശോധിച്ചാല്‍ ലഭിക്കുക മലയാളത്തിലും. കോടതികളില്‍ വരെ മലയാളം വന്നു തുടങ്ങി. ഇവിടെ തുടങ്ങുന്നു അവ്യക്തതയുടെ പൊടിപൂരം.വ്യക്തമായ നിര്‍ദേശം ഇക്കാര്യത്തില്‍ ബി.എല്‍.ഓമാര്‍ക്ക് കിട്ടിയിട്ടില്ലെന്ന് ആദ്യമേ മനസ്സിലായി. ഒരു വീട്ടില്‍ മൂന്ന് പ്രാവശ്യം എത്തുമെന്നാണ് പറഞ്ഞിരുന്നത്. ഇപ്പോള്‍ പറയുന്നു ബി.എല്‍.ഓയുടെ വീട്ടില്‍ എത്തിച്ചു നല്‍കണമെന്ന്. ബി.എല്‍.ഓ ആവട്ടെ ഒച്ചിഴയുന്ന വേഗത്തിലുള്ള ആപും വച്ചും തിരിച്ച് കിട്ടിയത് അപ്്‌ലോഡ് ചെയ്യാനുള്ള തിരക്കിലാണ്.അപേക്ഷ ഫോമിന്റെ തുടക്കത്തില്‍ വോട്ടറുടെ 2025 ലെ പേരും പുതിയ എപിക് നമ്പറും അഡ്രസുമുണ്ട്.

അപേക്ഷ ഫോമിന്റെ വലതു മുകളിലെ ഭാഗം വിശദമായി പരിശോധിക്കാം :

ജനന തിയ്യതി
സാധാരണയായി എല്ലാവരുടേയും ജനിച്ച ദിവസവും മാസവും വര്‍ഷവും രേഖയിലുണ്ടാവും. എന്നാല്‍ 60-70 വയസ്സിന് മുകളിലുള്ള ചിലര്‍ക്ക് വര്‍ഷം മാത്രമേ രേഖയിലുണ്ടാവൂ. അപ്പുറത്തെ ആയിഷ പെറ്റതിന്റെ നാല്‍പ്പതിനാണ് ഇപ്പുറത്തെ ഇന്ദിര പെറ്റതെന്നാവും അവരുടെ കണക്ക്. ഓണം, പെരുന്നാള്‍, ക്രിസ്മസ് തുടങ്ങിയ വിശേഷ ദിവസങ്ങളാണ് ജനിച്ചോസത്തിന് ആധാരമാക്കുന്നത്. വര്‍ഷം മാത്രമുള്ള ജനന തിയതി ഉള്‍പ്പെടുത്തി തല്‍ക്കാലം പിടിച്ചു നില്‍ക്കാം.

ആധാര്‍ നമ്പര്‍
ആധാര്‍ നമ്പര്‍ ഒപ്ഷനിലാണ്. അതായത് നിര്‍ബന്ധമില്ല. എന്നാല്‍ ആധാര്‍ നമ്പര്‍ ഓണ്‍ലൈനില്‍ ലിങ്ക് ചെയ്യുമ്പോള്‍ തടസ്സം നേരിടേണ്ടി വരുന്നുണ്ടെന്നാണ് ബി.എല്‍.ഓമാര്‍ പറയുന്നത്. വ്യക്തികളുടെ സകലമാന ഇടപാടുകളും ആധാറുമായി ബന്ധിപ്പിച്ചിട്ടുണ്ട്. എന്നാപ്പിന്നെ എസ്.ഐ.ആര്‍ ആധാറുമായി ബന്ധിപ്പിച്ചാ പോരെയെന്നു ചോദിച്ചാല്‍ കമ്മീഷനു കമായെന്ന് മറുപടിയില്ല.

ഫോണ്‍ നമ്പര്‍
ഒരാള്‍ക്ക് മിനിമം രണ്ട് നമ്പറുള്ളതു കൊണ്ട് ഈ കോളം എല്ലാവര്‍ക്കും പൂരിപ്പിക്കാം. ആധാര്‍ നമ്പര്‍ നിര്‍ബന്ധമില്ലാത്ത എസ്.ഐ.ആറില്‍ ഫോണ്‍ നമ്പര്‍ നിര്‍ബന്ധമാണ്. ഇനി ഫോണ്‍ നമ്പര്‍ എപിക് നമ്പര്‍ ആക്കിയാലും തെറ്റില്ലായെന്നാണ് എന്റ അഭിപ്രായം.

പിതാവ്
പിതാവ് അല്ലെങ്കില്‍ രക്ഷിതാവ് എന്നാണ് ഫോമിലുള്ളത്. ബയോളജിക്കലി പിതാവ് ഒരാളായിരിക്കും. ഈ ചോദ്യം പലരേയും കണ്‍ഫ്യൂഷ്യനാക്കും. പിതോ രക്ഷതി കൗമാരേ-ഭര്‍ത്തോ രക്ഷതി യവ്വനേ എന്നാണെല്ലോ ചൊല്ലാറ്. അതനുസരിച്ച് പലരും രക്ഷകര്‍ത്താവായി ഭര്‍ത്താവിന്റെ പേര് വയ്ക്കും. പിന്നെ രക്ഷാകര്‍ത്വത്തെച്ചൊല്ലിയാവും തര്‍ക്കം.

എപിക് നമ്പര്‍
ഒരു വോട്ടര്‍ക്ക് ഓരോ സമയത്തും ഓരോ എപിക് നമ്പറാണുണ്ടാവുക. യഥാര്‍ത്ഥത്തില്‍ ഇപ്പോള്‍ പ്രവര്‍ത്തിച്ച് കൊണ്ടിരിക്കുന്ന ‘സോറി’ പൂരിപ്പിച്ച് കൊണ്ടിരിക്കുന്ന ഫോമിനു മുകളിലായി കാണുന്ന നമ്പറാണ് എഴുതേണ്ടത്. പലരും പിതാവിന്റെ അല്ലങ്കില്‍ രക്ഷിതാവിന്റെ പഴയ തിരിച്ചറിയല്‍ കാര്‍ഡിന്റെയോ 2002ലേ കാര്‍ഡിന്റെയോ എപിക് നമ്പര്‍ അവിടെ എഴുതും.
പിന്നെ എപിക് നമ്പര്‍ ഉണ്ടെങ്കില്‍ എന്നൊരു കെണിയുണ്ട്. അതിനര്‍ഥം നിര്‍ബന്ധമില്ല എന്നല്ല. ഉണ്ടായിട്ടും എഴുതാത്ത മഹാന്‍മാരും ഉണ്ട്. ബന്ധുക്കളെയെല്ലാം ഒരുമിച്ച് കൊണ്ടുവരാനാണെന്നാ പറയുന്നത്.

അടുത്തത് മാതാവാണ്. വര്‍ഷങ്ങളോളം ഭര്‍ത്താവിന്റെ വീട്ടില്‍ കഴിയുന്ന സ്ത്രീകള്‍ ഭര്‍ത്താവിന്റെ മാതാവിന്റെ പേരും മാതാവിന്റെ സ്ഥാനത്ത് എഴുതും. തുടര്‍ന്ന് മാതാവിന്റെ എപിക്ക് നമ്പര്‍ ഉണ്ടെങ്കില്‍ അതും വേണം.

പങ്കാളി

ബിഗ് ബോസ് തിയറിയനുസരിച്ച് ആണു-ആണും പെണ്ണും-പെണ്ണും പങ്കാളികളാണ്.ചിലര്‍ മൃഗങ്ങളെയും പങ്കാളികളാക്കുന്നു. ഇവിടെ ബന്ധം വേര്‍പ്പെടുത്താതെ അകന്നു കഴിയുന്നവര്‍ ആകെ കണ്‍ഫ്യൂഷനാവും. ഒരു പക്ഷേ വര്‍ഷങ്ങളായി അകന്നു കഴിയുന്നവരെ എസ്.ഐആറിന്റെ പേരില്‍ ഒരുമിപ്പിക്കാനാവും വിധി. തുടര്‍ന്ന് പങ്കാളിയുടെ നമ്പര്‍ ആണ്. ഇതോടെ ലേറ്റസ്റ്റ് ആയ 2025 ലെ മുഴുവന്‍ വിവരവും കിട്ടും.

ഫോമിന്റെ ഇടതു താഴ്ഭാഗം
2025 ലെ വോട്ടര്‍ 2002 ലെ പട്ടികയില്‍ ഉള്‍പ്പട്ടിട്ടുണ്ടോ എന്നറിയാനാണ് പ്രസ്തുത ഭാഗം. 2002ലെ വോട്ടര്‍പട്ടികയുമായി വീട് കയറുന്ന ബി.എല്‍.ഓ, അന്നത്തെ ക്രമനമ്പര്‍ ആ വീട്ടുകാര്‍ക്ക് എഴുതി നല്‍കിയാല്‍ ഈ പുകിലൊക്കെ പരിഹരിക്കാമായിരുന്നു.
2002 ലെ വോട്ടര്‍പട്ടിക കണ്ടാല്‍ പെറ്റ തള്ള സഹിക്കൂല. അബ്ദുല്‍ റസാഖിന് പകരം അബ്ദുല്‍ എന്ന് മാത്രമായിരിക്കും. അബ്ദുലിന്റെ ബന്ധു ആമിന എന്നാവും. എന്നിട്ട് മാതാവിന് പകരം ഭര്‍ത്താവെന്ന് ബന്ധം എഴുതും. എന്നാല്‍ ഇവയൊക്കെ ശരിയാക്കി നല്‍കിയാല്‍ 2002ലെ വിവരങ്ങളുമായി മാച്ചായില്ലയെന്നു പറഞ്ഞ് അപേക്ഷ നിരസിക്കപ്പെടാം. ആയതിനാല്‍ 2002 ലെ പട്ടികയില്‍ എന്താണോയുള്ളത് അവ എഴുതുന്നതാണ് കൂടുതല്‍ സേഫ്റ്റി.

ഫോമിന്റെ വലതു താഴ്ഭാഗം
മുന്‍കോളത്തില്‍ അവസാന എസ്.ഐ.ആറില്‍ പേര് നല്‍കിയിരിക്കുന്ന വോട്ടറുടെ ബന്ധുവിന്റെ വിശദാംശങ്ങള്‍. ചോദ്യം കണ്ടാല്‍ തല കറങ്ങും. 2002 ലെ പട്ടികയില്‍ പേരില്ലാത്തവരുടെ ബന്ധുക്കളുടെ വിവരമാണ് ഇവിടെ പൂരിപ്പിക്കേണ്ടത്. അതായത് ഉത്തമാ, ആ ഫോമിന്റെ തുടക്കത്തില്‍ അച്ചടിച്ചു വച്ചിരിക്കുന്ന വോട്ടറുടെ ബന്ധുവിന്റെ പേരാണ് എഴുതേണ്ടത്. ആദ്യ സമയങ്ങളില്‍ പാരമ്പര്യവുമായി ബന്ധമുള്ള ആരെങ്കിലും മതിയെന്നാണ് പറഞ്ഞിരുന്നത്. ഇപ്പോള്‍ പറയുന്നു അച്ഛനും മുത്തച്ഛനുമൊക്കെയുള്ളൂ മറ്റു ബന്ധുക്കളെ ചേര്‍ക്കാനുള്ള ഓപ്ഷന്‍ ഓണ്‍ലൈനില്‍ ലഭ്യമല്ലായെന്ന്.

വര്‍ഷങ്ങള്‍ക്കു മുന്നേ പ്രമിച്ച് വീട്ടുകാരെ ഉപേക്ഷിച്ച് നാടുവിട്ടവരും മതം മാറാന്‍ വേണ്ടി വീട്ടുകാരെ ഉപേക്ഷിച്ചവരും ഇനി കുടുംബ ബന്ധം തേടിയിറങ്ങേണ്ടിവരും. കൂടാതെ അതിര്‍ഥി സംസ്ഥാനമായ കര്‍ണാടകയില്‍ 2002 ല്‍ വോട്ട് ചെയ്ത് ജോലിയാവശ്യാര്‍ഥം കേരളത്തില്‍ സ്ഥിര താമസമാക്കിയ വോട്ടര്‍ ഇവിടെ കെണിയിലാവും. കര്‍ണാടയിലെ 2002ലെ പട്ടിക ലഭിക്കാത്ത വോട്ടര്‍ എന്തു ചെയ്യുണമെന്നു കലക്ടറോട് ചോദിച്ചിട്ടു ലഭിച്ച മറുപടി ഹിയറിങ്ങിനു വന്നാല്‍ മതിയെന്ന്. അതായത് ഒരു വോട്ടറെ പട്ടികയില്‍ ഉള്‍പ്പെടുത്തണമെന്ന താല്‍പര്യം കലക്ടര്‍ക്കില്ല. വോട്ടര്‍ വേണമെങ്കില്‍ അന്വേഷിച്ച് കണ്ടെത്തണം.

വോട്ടറെ കണ്ടെത്തി പേര് ചേര്‍ക്കല്‍ ഒരു മാസം കൊണ്ട് പൂര്‍ത്തിയാവില്ലെന്ന് മനസ്സിലായതോടെയാണ് നാട്ടുകാരുടെ സഹായത്തോടെ ക്യാംപുകള്‍ സംഘടിപ്പിച്ചു തുടങ്ങിയത്. പഞ്ചായത്ത് തിരഞ്ഞെടുപ്പായതിനാല്‍ രാഷ്ട്രീയക്കാര്‍ ചാകര പ്രതീക്ഷിച്ചാണ് ക്യാംപിലേക്ക് എത്തിയതെങ്കിലും തൊട്ടവര്‍ക്കെല്ലാം കൈ പൊള്ളിയ അവസ്ഥയാണ്. എന്തു കിട്ടിയാലും എഴുതി കൊടുക്കാറുള്ള പ്രാഞ്ചിയേട്ടന്‍മാര്‍ക്ക് ബോധം വന്നത് അപേക്ഷകള്‍ തെറ്റായി പൂരിപ്പിച്ച ശേഷമാണ്. ഒരു ഹൗസ് വൈഫിന് കലക്ടര്‍ ഉദ്യോഗം ലഭിച്ച പ്രതീതിയാണ് ക്യാംപിലൂടെ ലഭിച്ചത്. എഴുത്തും വായനയും അറിയാവുന്ന സ്ഥാനാര്‍ഥികള്‍ എഴുതിയെഴുതി വോട്ടു പിടിക്കാന്‍ പോവാന്‍ പറ്റാത്ത അവസ്ഥയായി. അല്ലാത്തവര്‍ ചായ വാങ്ങി നല്‍കിയും തിരക്കു നിയന്ത്രിച്ചും വോട്ടറുടെ പ്രീതി പറ്റാനുള്ള ശ്രമത്തിലാണ്.എങ്ങനെയായാലും പഞ്ചായത്ത് തിരഞ്ഞെടുപ്പും എസ്.ഐ.ആറും ഒരുമിച്ച് നടത്തി കമ്മീഷന്‍ ക്രഡിറ്റ് അടിച്ചെടുക്കും