ചെന്നൈ: പോക്സോ കോടതി ജഡ്ജിക്ക് നിര്‍ബന്ധിത നിയമ പരിശീലനം നല്‍കാന്‍ മദ്രാസ് ഹൈക്കോടതി ഉത്തരവ്. തമിഴ്‌നാട് ദിണ്ടിഗല്‍ കോടതിയിലെ ജഡ്ജിയെ നിയമ പരിശീലനത്തിനായി സംസ്ഥാന ജുഡീഷ്യല്‍ അക്കാദമിയിലേക്ക് അയക്കാന്‍ രജിസ്ട്രിക്ക് മദ്രാസ് ഹൈക്കോടതി നിര്‍ദേശം നല്‍കി. ജഡ്ജി നിയമത്തിലെ അടിസ്ഥാന തത്വങ്ങള്‍ പഠിക്കട്ടെ എന്ന് വ്യക്തമാക്കിയാണ് ഹൈക്കോടതിയുടെ നടപടി. ദിണ്ടിഗല്‍ സ്വദേശിയായ യുവാവിനെ ജീവപര്യന്തം തടവിനു ശിക്ഷിച്ച ഉത്തരവ്റ ദ്ദാക്കിക്കൊണ്ടുള്ള ഉത്തരവിലാണ് നിര്‍ദേശം. 2022 മെയില്‍ പത്താം ക്ലാസ് വിദ്യാര്‍ത്ഥിനിയെ കാണാതായതുമായി ബന്ധപ്പെട്ട കേസില്‍ ആണ് ഉത്തരവ്. ഒക്ടോബറില്‍ പെണ്‍കുട്ടി തിരിച്ചെത്തിയശേഷം നാട്ടുകാരനായ യുവാവിനൊപ്പം തിരുപ്പൂരില്‍ താമസിച്ചെന്നും യുവാവ് താലി കെട്ടിയെന്നും 164 പ്രകാരം മൊഴി നല്‍കിയിരുന്നു.എന്നാല്‍, പെണ്‍കുട്ടിയെ പിതാവ് പൊലീസ് സ്റ്റേഷനില്‍ കൊണ്ടുപോയി പരാതി നല്‍കുകയായിരുന്നു. തുടര്‍ന്ന് ദിണ്ടിഗല്‍ ആശുപത്രിയില്‍ കൊണ്ടുപോയി മെഡിക്കല്‍ പരിശോധന നടത്തുകയും കോടതിയില്‍ എത്തിച്ച് സെക്ഷന്‍ 164 പ്രകാരം പിതാവ് പറഞ്ഞതനുസരിച്ചുള്ള മൊഴിയും പെണ്‍കുട്ടി നല്‍കുകയും ചെയ്തു. തുടര്‍ന്നാണ് യുവാവിനെതിരെ പോക്സോ വകുപ്പ് ഉള്‍പ്പെടെ ചേര്‍ത്ത് പ്രതിചേര്‍ത്തത്. എന്നാല്‍,വിചാരണയ്ക്കിടെ പെണ്‍കുട്ടി യുവാവിനെ അറിയില്ലെന്നും ശാരീരികബന്ധം ഉണ്ടായിട്ടില്ലെന്നും 164 പ്രകാരം മൊഴി നല്‍കിയത് അച്ഛന്റെ നിര്‍ബന്ധപ്രകാരം ആണെന്നും പിന്നീട് നിലപാട് മാറ്റിയിരുന്നു. എന്നാല്‍, ആദ്യം നല്‍കിയ മൊഴിയുടെയും ഡോക്ടറുടെ റിപ്പോര്‍ട്ടിന്റെയും അടിസ്ഥാനത്തില്‍ പോക്സോ കോടതി യുവാവിനെ ശിക്ഷിക്കുകയായിരുന്നു. വെറും മൊഴിയുടെ അടിസ്ഥാനത്തില്‍ മാത്രമാണ് ശിക്ഷ വിധിച്ചതെന്നും നിയമപരമായ യാതൊരു തെളിവും കണ്ടെത്താനായിട്ടില്ലെന്നും നിരീക്ഷിച്ചുകൊണ്ടാണ് പോക്സോ കോടതി ഉത്തരവ് ഹൈക്കോടതി റദ്ദാക്കിയത്. ജസ്റ്റിസ് എഡി ജഗദീഷ് ചന്ദ്ര, ജസ്റ്റിസ് ആര്‍ പൂര്‍ണിമ എന്നിവരടങ്ങിയ ബെഞ്ചാണ് ഉത്തരവിറക്കിയത്.
പോക്സോ കോടതി ജഡ്ജിക്ക് നിയമ പരിശീലനം നല്‍കാന്‍ മദ്രാസ് ഹൈക്കോടതി ഉത്തരവ്.
