ചെന്നൈ: തമിഴ്നാട്ടിലെ കരൂരില്‍ തിക്കിലും തിരക്കിലും പെട്ടുണ്ടായ ദുരന്തവുമായി ബന്ധപ്പെട്ട ഹര്‍ജികളില്‍ സുപ്രീംകോടതിയുടെ നിര്‍ണായക വിധി വരാനിരിക്കെ, ഹര്‍ജിക്കാര്‍ സുപ്രീം കോടതിയെ തെറ്റിദ്ധരിപ്പിച്ചെന്ന് ഡിഎംകെ. രണ്ട് ഹര്‍ജിക്കാര്‍ ഉന്നയിച്ച അവകാശവാദങ്ങള്‍ വ്യാജമാണെന്നും, ‘മരിച്ചയാളുടെ ബന്ധു’ എന്ന് പറഞ്ഞുള്ള വാദം തെറ്റാണെന്നും ഡി.എം.കെ. സംഘടന സെക്രട്ടറി ആര്‍എസ് ഭാരതി പറയുന്നു. ഈ വസ്തുതകള്‍ കോടതി പരിഗണിച്ച് തീരുമാനം എടുക്കണമെന്നും അദ്ദേഹം ആവശ്യപ്പെട്ടു. കഴിഞ്ഞ തവണ ഹര്‍ജി പരിഗണിച്ചപ്പോള്‍ കോടതിയുടെ പല ചോദ്യങ്ങളും തമിഴ്നാട് സര്‍ക്കാരിനെ പ്രതിരോധത്തിലാക്കിയിരുന്നു. കരൂര്‍ തിക്കിലും തിരക്കിലും പെട്ടുണ്ടായ അപകടത്തിലെ പ്രത്യേക സംഘത്തിന്റെ അന്വേഷണത്തിനെതിരായ ഹര്‍ജികളിലാണ് സുപ്രീംകോടതി ഉത്തരവ് പറയാനായി മാറ്റിയത്. ആള്‍ക്കൂട്ട ദുരന്തങ്ങള്‍ ഒഴിവാക്കാന്‍ മാര്‍ഗ്ഗനിര്‍ദ്ദേശങ്ങള്‍ വേണമെന്ന് കാട്ടി നല്‍കിയ ഹര്‍ജിയില്‍ എന്തിനാണ് ഹൈക്കോടതി പ്രത്യേക സംഘത്തെ അന്വേഷണത്തിനായി നിയോഗിച്ച ഉത്തരവിറക്കിയതെന്ന് സുപ്രീംകോടതി ചോദ്യം ചെയ്തിരുന്നു. സംഭവസ്ഥലത്ത് നിന്ന് പോലീസിന്റെ നിര്‍ദ്ദേശത്തെ തുടര്‍ന്നാണ് പിന്മാറിയതെന്നും ഹൈക്കോടതിയുടെ പരാമര്‍ശങ്ങള്‍ അതിരുകടന്നതാണെന്നും ടി.വി.കെ. അഭിഭാഷകര്‍ കോടതിയില്‍ വാദിച്ചു. എസ് ഐ ടി അന്വേഷണത്തില്‍ ടിവികെയും അപകടത്തില്‍ മരിച്ച ചില ഇരകളുടെ കുടുംബവും അതൃപ്തി അറിയിക്കുകയും ചെയ്തു. സുപ്രീംകോടതിയുടെ നേതൃത്വത്തില്‍ അന്വേഷണം വേണമെന്നും എങ്കിലേ കൃത്യമായ അന്വേഷണം നടക്കുകയുള്ളൂ എന്നും ടിവികെ ആവശ്യപ്പെട്ടു. തമിഴ്നാട് പോലീസിന്റെ വീഴ്ചയാണ് അപകടത്തിന് കാരണമെന്ന് ഇരകളുടെ കുടുംബം കോടതിയില്‍ പറഞ്ഞു. ആള്‍ക്കൂട്ടത്തിനു നേരെ പോലീസ് ലാത്തിച്ചാര്‍ജ് നടത്തി പ്രകോപനം സൃഷ്ടിച്ചുവെന്നും കുടുംബങ്ങള്‍ കോടതിയെ അറിയിച്ചിരുന്നു. എന്നാല്‍, എസ്.ഐ.ടി. അന്വേഷണത്തില്‍ ഇതുവരെ വീഴ്ച ഉണ്ടായിട്ടില്ലെന്നും സി.ബി.ഐ. അന്വേഷണത്തിന്റെ ആവശ്യമില്ലെന്നും തമിഴ്നാട് സര്‍ക്കാര്‍ കോടതിയില്‍ വാദിച്ചു. ഹര്‍ജിക്കാരുടെ വിശ്വാസ്യത ചോദ്യം ചെയ്തുകൊണ്ട് ഡി.എം.കെ. രംഗത്തുവന്ന സാഹചര്യത്തില്‍, നാളത്തെ സുപ്രീം കോടതിയുടെ വിധി നിര്‍ണായകമാകും.
വിജയ്ക്ക് നിര്‍ണായക വിധിവരാനിരിക്കെ, കരൂര്‍ കേസില്‍ ആള്‍മാറാട്ട ആരോപണവുമായി ഡി.എം.കെ.
