കോഴിക്കോട്: മുനമ്പം വഖഫ് ഭൂമിയിലെ താമസക്കാരുടെ പ്രശ്‌നപരിഹാരത്തിന് സര്‍ക്കാര്‍ നിയോഗിച്ച റിട്ട. ജഡ്ജി സി.എന്‍ രാമചന്ദ്രന്‍ നായര്‍ കമീഷന്റെ നിയമന സാധുത പരിശോധിച്ച ഡിവിഷന്‍ ബെഞ്ച് നടത്തിയ അനാവശ്യ നിരീക്ഷണങ്ങള്‍ പരിധി വിട്ടതും വഖഫുമായി ബന്ധപ്പെട്ട് ഉത്തരേന്ത്യയിലെ കോടതികള്‍ വെച്ചുപുലര്‍ത്തുന്ന മുന്‍വിധിയോടെയുള്ള സമീപനം കേരളത്തിലേക്കും കടത്തിക്കൊണ്ടു വരുന്നതാണെന്നും ഐ..എന്‍.എല്‍ സംസ്ഥാന പ്രവര്‍ത്തക സമിതി അഭിപ്രായപ്പെട്ടു. മുനമ്പം ഭൂമി വഖഫാണോ അല്ലയോ എന്ന് പരിശോധിക്കലല്ല, മറിച്ച് വര്‍ഷങ്ങളായി അവിടെ താമസിക്കുന്നവരുടെ പ്രശ്‌നം എങ്ങനെ പരിഹരിക്കാം എന്നത് സംബന്ധിച്ച് വസ്തുതാന്വേഷണം നടത്താനാണ് ജുഡീഷ്യല്‍ കമീഷനെ നിയോഗിച്ചതെന്ന് സര്‍ക്കാര്‍ നേരത്തേ വ്യക്തമാക്കിയതാണ്. എന്നിട്ടും വിവാദ ഭൂമി വഖഫ് അല്ലെന്നും ദാനാധാരത്തിലൂടെ കിട്ടിയതാണെന്നും തീര്‍പ്പ് കല്‍പിച്ച ചീഫ് ജസ്റ്റീസ് എസ്.എ ധര്‍മാധികാരി ഉള്‍പ്പെട്ട ഡിവിഷന്‍ ബെഞ്ച് വഖഫുകളെ കുറിച്ച് ഹിന്ദുത്വവാദികള്‍ പ്രചരിപ്പിക്കുന്ന അവഹേളനപരമായ നിരീക്ഷണങ്ങള്‍ നടത്തിയത് മതേതര വിശ്വാസികളെ ആശങ്കാകുലരാക്കുന്നുണ്ടെന്ന് ഐ.എന്‍.എല്‍ പ്രമേയത്തില്‍ ചൂണ്ടിക്കാട്ടി. മുനമ്പത്തെ വിവാദഭൂമിയില്‍ താമസിക്കുന്ന 600 കുടുംബങ്ങളുടെ ഉപജീവനമാര്‍ഗം ഇല്ലാതാക്കി ഭൂമി തട്ടിയെടുക്കാനുള്ള ശ്രമമാണ് സംസ്ഥാന വഖഫ് ബോര്‍ഡ് നടത്തിയതെന്നും ഇക്കണക്കിന് പോയാല്‍ ഭാവിയില്‍ ഏതെങ്കിലുമൊക്കെ രേഖകള്‍ വെച്ച് താജ്മഹലോ ചെങ്കോട്ടയോ നിയമസഭ മന്ദിരമോ ഹൈകോടതി പോലുമോ വഖഫ് സ്വത്തായി ചിത്രീകരിച്ചുകൂടായ്കയില്ലെന്നുമാണ് ഡിവിഷന്‍ ബെഞ്ച് നിരീക്ഷിച്ചിരിക്കുന്നത്. ദൂരവ്യാപക പ്രത്യാഘാതമുള്ള കോടതി വിധി ആശങ്കാജനകമാ?ണെന്നും വഖഫുകളുടെ സംരക്ഷണം അവതാളത്തിലാക്കുമെന്നും ഐ.എന്‍.എല്‍ മുന്നറിയിപ്പ് നല്‍കി. യോഗത്തില്‍ സംസ്ഥാന പ്രസിഡന്റ് അഹമ്മദ് ദേവര്‍കോവില്‍ അധ്യക്ഷത വഹിച്ചു. യു.ഡി.എഫിന്റെ വികസന വിരുദ്ധ, സംഘ്പരിവാര്‍ അനുകൂല നിഷേധാത്മക രാഷ്ട്രീയത്തിനെതിരെ സംസ്ഥാന വ്യാപകമായി കാമ്പയിന്‍ നടത്താന്‍ തീരുമാനിച്ചു. ജനറല്‍ സെക്രട്ടറി കാസിം ഇരിക്കുര്‍ സ്വാഗതം പറഞ്ഞു. എം.എ ലത്തീഫ് നന്ദി പറഞ്ഞു.
മുനമ്പം വഖഫ്: ഹൈകോടതി നിരീക്ഷണംപരിധി വിട്ട കളി – ഐ.എൻ.എൽ
