കൊച്ചി: വാര്‍ത്താ ചാനലായ റിപ്പോര്‍ട്ടര്‍ നെറ്റ്വര്‍ക്കിന്റെ ന്യൂസ് ഡെസ്‌കില്‍ തനിക്ക് മോശം അനുഭവം നേരിട്ടുവെന്ന് വെളിപ്പെടുത്തി മാധ്യമപ്രവര്‍ത്തക അഞ്ജന അനില്‍കുമാര്‍. എന്തുകൊണ്ടാണ് ലൈംഗീക ആരോപണങ്ങള്‍ നേരിടുന്ന യൂത്ത് കോണ്‍ഗ്രസ് നേതാവ് രാഹുല്‍ മാങ്കൂട്ടത്തിലിന്റെ വിഷയത്തില്‍ പരാതി നല്‍കാന്‍ യുവതികള്‍ ഭയക്കുന്നതെന്ന ചോദ്യത്തിന് മറുപടിയായാണ് തനിക്കുണ്ടായ ദുരനുഭവം അഞ്ജന ഫെയ്സ്ബുക്ക് പോസ്റ്റിലൂടെ തുറന്നെഴുതിയത്. കഴിഞ്ഞ മെയ് മാസത്തില്‍ മൂന്ന് ദിവസത്തെ ഡെപ്യൂട്ടേഷനില്‍ ന്യൂസ് ഡെസ്‌കില്‍ ജോലി ചെയ്യാനെത്തിയപ്പോഴാണ് സംഭവമെന്നാണ് അഞ്ജന പറയുന്നത്. അടുത്ത സുഹൃത്തായി കണ്ടിരുന്ന ഒരു സഹപ്രവര്‍ത്തകനില്‍ നിന്നും മോശമായ ഒരു അനുഭവം നേരിടേണ്ടി വന്നു. സംഭവിച്ചതിന്റെ ഞെട്ടലില്‍ അപ്പോള്‍ ഒന്നും ചെയ്യാന്‍ കഴിഞ്ഞില്ല.ഇതിനെക്കുറിച്ച് മുതിര്‍ന്ന മാധ്യമപ്രവര്‍ത്തകരായ സുഹൃത്തുക്കളോട് സംസാരിച്ചപ്പോള്‍, പരാതി നല്‍കിയാല്‍ അത് തനിക്കാണ് ദോഷകരമായി ബാധിക്കുക എന്ന ഉപദേശമാണ് ലഭിച്ചത്. ”പരാതി നല്‍കിയാല്‍ പിന്നീട് അതിന്റെ പേരില്‍ അനുഭവിക്കേണ്ടിവരുന്നത് ഞാന്‍ തന്നെയായിരിക്കും” എന്ന് തിരിച്ചറിഞ്ഞതിനാല്‍ ഔദ്യോഗികമായി പരാതി നല്‍കിയില്ല. എന്നാല്‍ പ്രതികരിക്കാന്‍ തീരുമാനിച്ച അഞ്ജന, അടുത്ത ദിവസം തന്നെ ആ വ്യക്തിക്ക് ശക്തമായ മറുപടി നല്‍കി. എന്നാല്‍ മറുപടി നല്‍കിയതിന് ശേഷം പല ഭാഗത്തുനിന്നും ഫോണ്‍ കോളുകള്‍ വന്നുവെങ്കിലും,താന്‍ എന്തുകൊണ്ട് അങ്ങനെ പ്രതികരിച്ചു എന്നതിനെക്കുറിച്ച് ആരും തിരക്കിയില്ലെന്നും അഞ്ജന പറയുന്നു.സംഭവം എല്ലാവരും മറന്ന ശേഷമാണ് ഈ വിഷയത്തിന്റെ പേരില്‍ താന്‍ മാറ്റിനിര്‍ത്തപ്പെടുന്നു എന്ന് അഞ്ജന തിരിച്ചറിയുന്നത്.ഒരു മെഡിക്കല്‍ എമര്‍ജന്‍സി ആവശ്യത്തിന് ലീവ് ചോദിച്ചപ്പോള്‍ അത് നിഷേധിക്കപ്പെട്ടു. ലീവ് നിഷേധിച്ചതിന് പിന്നില്‍ പഴയ സംഭവമാണെന്ന് പിന്നീട് മനസ്സിലാക്കാന്‍ സാധിച്ചു. തന്നെ ജോലിയില്‍ നിന്ന് പുറത്താക്കാന്‍ അവര്‍ക്ക് ഉദ്ദേശമില്ലായിരുന്നു എന്നും, കുറച്ചുദിവസം ഓടിക്കുകയും വട്ടം കറക്കുകയും ചെയ്യുക എന്നതായിരുന്നു ലക്ഷ്യമെന്നും അഞ്ജന ആരോപിക്കുന്നു.ഈ അനുഭവങ്ങളുടെ പശ്ചാത്തലത്തില്‍, പരാതി നല്‍കാന്‍ ആവശ്യപ്പെടുന്നത് എളുപ്പമാണെന്നും എന്നാല്‍ അതിന് ശേഷം നേരിടേണ്ടിവരുന്ന ബുദ്ധിമുട്ടുകള്‍ കാരണം പലരും അതില്‍ നിന്നും പിന്തിരിയുമെന്നും അഞ്ജന തന്റെ ഫെയ്സ്ബുക്ക് പോസ്റ്റില്‍ പറയുന്നു. രാഹുല്‍ മാങ്കൂട്ടത്തിലിനെതിരായ ആരോപണങ്ങള്‍ ചര്‍ച്ച ചെയ്യുമ്പോള്‍ മാധ്യമസ്ഥാപനങ്ങളില്‍ നടക്കുന്ന ഇത്തരം വിഷയങ്ങളും ചര്‍ച്ച ചെയ്യപ്പെടേണ്ടതാണെന്നും അഞ്ജന കൂട്ടിച്ചേര്‍ത്തു.
റിപ്പോര്‍ട്ടര്‍ ചാനലില്‍ തനിക്ക് മോശം അനുഭവം നേരിട്ടുവെന്ന് വെളിപ്പെടുത്തി മാധ്യമപ്രവര്‍ത്തക അഞ്ജന അനില്‍കുമാര്‍
