കൊച്ചി: റിപ്പോര്‍ട്ടര്‍ ചാനലിലെ വനിതാ മാധ്യമപ്രവര്‍ത്തകയ്ക്ക് നേരെയുണ്ടായ ലൈംഗികാതിക്രമം സംബന്ധിച്ച ആരോപണത്തില്‍ സമഗ്രമായ അന്വേഷണം ആവശ്യപ്പെട്ട് കോണ്‍ഗ്രസ് നേതാവ് വി.ടി. ബല്‍റാം. മുഖ്യമന്ത്രിയുടെ ഓഫീസ് വിഷയത്തില്‍ അടിയന്തരമായി ഇടപെടണമെന്നും ക്രൈംബ്രാഞ്ച് സ്പെഷ്യല്‍ ടീം രൂപീകരിച്ച് അന്വേഷണം നടത്തണമെന്നും അദ്ദേഹം തന്റെ ഫെയ്‌സ്ബുക്ക് പോസ്റ്റിലൂടെ ആവശ്യപ്പെട്ടു.റിപ്പോര്‍ട്ടര്‍ ചാനലിലെ മുന്‍ മാധ്യമപ്രവര്‍ത്തക ഉന്നയിച്ച ഗുരുതരമായ ആരോപണങ്ങള്‍ ചൂണ്ടിക്കാട്ടിയാണ് വി.ടി. ബല്‍റാമിന്റെ പ്രതികരണം. ന്യൂസ് റൂമില്‍ വെച്ച് മുതിര്‍ന്ന മാധ്യമപ്രവര്‍ത്തകന്‍ ലൈംഗികാതിക്രമം നടത്തിയെന്നും, അതിനെതിരെ പരാതി നല്‍കുന്നതില്‍ നിന്ന് മറ്റ് മുതിര്‍ന്ന മാധ്യമപ്രവര്‍ത്തകര്‍ പിന്തിരിപ്പിച്ചെന്നുമാണ് മാധ്യമ പ്രവര്‍ത്തക വെളിപ്പെടുത്തിയിരിക്കുന്നത്. കൂടാതെ ഈ സംഭവത്തിന് ശേഷം ആരോഗ്യപരമായ കാരണങ്ങളാല്‍ അവധി ആവശ്യപ്പെട്ടപ്പോള്‍ മാനേജ്‌മെന്റ് ക്രൂരമായി പെരുമാറിയെന്നും, ഒടുവില്‍ രാജി വെക്കാന്‍ നിര്‍ബന്ധിതയാവുകയായിരുന്നു എന്നും അവര്‍ വെളിപ്പെടുത്തിയിരുന്നു. അതിജീവിത പരസ്യമായി ഉന്നയിച്ച ഈ ആരോപണങ്ങള്‍ പ്രഥമദൃഷ്ട്യാ തന്നെ കുറ്റകരമാണെന്നും അദ്ദേഹം വ്യക്തമാക്കി.മുഖ്യമന്ത്രിയുടെ ഓഫീസിനെയും സംസ്ഥാന പോലീസ് മേധാവിയെയും ടാഗ് ചെയ്തുകൊണ്ടാണ് വി.ടി. ബല്‍റാം ഈ വിഷയത്തില്‍ ഉടന്‍ നടപടി ആവശ്യപ്പെട്ടിരിക്കുന്നത്.
റിപ്പോര്‍ട്ടര്‍ ചാനലിലെ ലൈംഗികാതിക്രമം : സമഗ്രമായ അന്വേഷണം ആവശ്യപ്പെട്ട് വി.ടി. ബല്‍റാം.
