തൃശൂര്‍: റിപ്പോര്‍ട്ടര്‍ ടിവിയുടെ തൃശൂര്‍ ബ്യൂറോക്ക് നേരെ യൂത്ത് കോണ്‍ഗ്രസ് പ്രവര്‍ത്തകര്‍ ആക്രമണം നടത്തി. മുദ്രാവാക്യം വിളിച്ചെത്തിയ പ്രവര്‍ത്തകര്‍ ഓഫീസിലേക്കുള്ള പടികളിലും വാതിലിലും കരിഓയില്‍ ഒഴിച്ചു. വാതിലില്‍ റിപ്പോര്‍ട്ടറിനെതിരെ പോസ്റ്റര്‍ പതിക്കുകയും ബ്യൂറോയില്‍ നിര്‍ത്തിയിട്ടിരുന്ന കാറിന് മുകളില്‍ യൂത്ത് കോണ്‍ഗ്രസിന്റെ കൊടി സ്ഥാപിക്കുകയും ചെയ്തു. രാഹുല്‍ മാങ്കൂട്ടത്തില്‍ വിഷയത്തില്‍ കോണ്‍ഗ്രസിനെ ലക്ഷ്യംവെച്ച് ചാനല്‍ നിരന്തരം വാര്‍ത്തകള്‍ നല്‍കുന്നുവെന്ന് യൂത്ത് കോണ്‍ഗ്രസ് ആരോപിക്കുന്നു. ഇതിനുപുറമെയാണ് ചാനലിലെ മുന്‍ മാധ്യമപ്രവര്‍ത്തകരായ അഞ്ജന അനില്‍കുമാര്‍, വീണ ചാന്ദ് എന്നിവര്‍ സഹപ്രവര്‍ത്തകരില്‍ നിന്നും നേരിടേണ്ടി വന്നദുരനുഭവങ്ങളെക്കുറിച്ച് സോഷ്യല്‍ മീഡിയയിലൂടെ നടത്തിയ വെളിപ്പെടുത്തലുകള്‍. ഈ പീഡനാരോപണങ്ങള്‍ വലിയ ചര്‍ച്ചയാവുകയും സ്ഥാപനത്തിനെതിരെ പൊതുവികാരം രൂപപ്പെടുകയും ചെയ്തിരുന്നു. ഈ രണ്ടു വിഷയങ്ങളും ഉന്നയിച്ചായിരുന്നു യൂത്ത് കോണ്‍ഗ്രസിന്റെ പ്രതിഷേധം. സംഭവത്തില്‍ റിപ്പോര്‍ട്ടര്‍ ടിവി മുഖ്യമന്ത്രിക്ക് പരാതി നല്‍കി. യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി മിഥുന്‍ മോഹന്‍, ജില്ലാ വൈസ് പ്രസിഡന്റ് വിഷ്ണു ചന്ദ്രന്‍, തൃശൂര്‍ അസംബ്ലി പ്രസിഡന്റ് കെ. സുമേഷ്, വില്‍വട്ടം മണ്ഡലം പ്രസിഡന്റ് സൗരാഗ്, നിഖില്‍ദേവ്, അമല്‍ ജയിംസ് എന്നിവരാണ് ഓഫീസ് ആക്രമിച്ചതെന്ന് പരാതിയില്‍ പറയുന്നു. ഇത് മാധ്യമ സ്വാതന്ത്ര്യത്തിന് മേലുള്ള കടന്നുകയറ്റമാണെന്നും പ്രതികളെ ഉടന്‍ അറസ്റ്റ് ചെയ്യണമെന്നും റിപ്പോട്ടര്‍ ടിവി മാനേജ്‌മെന്റ് സര്‍ക്കാരിനോട് ആവശ്യപ്പെട്ടു.
റിപ്പോര്‍ട്ടറിലെ പീഡനം, തൃശൂര്‍ ബ്യൂറോക്ക് നേരെ യൂത്ത് കോണ്‍ഗ്രസ് ആക്രമണം, വാതിലില്‍ കരിഓയില്‍ ഒഴിച്ചു, പോസ്റ്റര്‍ പതിച്ചു
