കണ്ണൂര്‍:എഴുപതുകളില്‍ ക്ലബ്ബ് ഫുട്‌ബോളിലും ദേശീയ ടീമിലും മധ്യനിരയിലെ കരുത്തായൊരു താരം ഇന്ന് ആരുമില്ലാത്തൊരു ജീവിത സായാഹ്നത്തിലാണ്. വാര്‍ധക്യത്തിലെ അവശതകളും രോഗവും തളര്‍ത്തിയ പ്രേംരാജ് ഗോവിന്ദെന്ന 73കാരന് ഒടുവില്‍ തലശ്ശേരിയിലെ അഗതി മന്ദിരം അഭയമായി. സ്വന്തം കുടുംബാംഗങ്ങളെ ഒന്ന് കാണാനും വീണ്ടും പരിശീലക കുപ്പായമണിയാനും ഒരുപാട് ആഗ്രഹിക്കുന്നുണ്ട് പ്രേംരാജ് ഗോവിന്ദ്.മധ്യനിരയില്‍ നിന്ന് എതിരാളികളുടെ ഗോള്‍മുഖം വരെ ചാട്ടൂളിപോലെ കുതിച്ചൊരു കാലം പ്രേംരാജ് ഗോവിന്ദിനുണ്ട്. കണ്ണൂരില്‍ പന്ത് തട്ടി തുടങ്ങി, മഹാരാഷ്ട്രയില്‍ കത്തിപടര്‍ന്ന്, കൊല്‍ക്കത്തയെ ത്രസിപ്പിച്ച പ്രേംരാജ് ഗോവിന്ദ് ജേഷ്ഠന്റെ പാത പിന്തുടര്‍ന്നാണ് കാല്‍പന്തുകളിയിലെത്തിയത്. കണ്ണൂര്‍ സ്പിരിറ്റഡ് യൂത്ത്‌സിനും ലക്കിസ്റ്റാറിനും വേണ്ടി പന്ത് തട്ടിയെങ്കിലും വെസ്റ്റേണ്‍ റെയില്‍വേ താരമായപ്പോഴാണ് ജീവിതം മാറിയത്.
അവിടെ കഴിഞ്ഞില്ല, കൊല്‍ക്കത്ത മുഹമ്മദന്‍സിനും സന്തോഷ് ട്രോഫിയില്‍ മഹാരാഷ്ട്രയ്ക്കും വേണ്ടി പ്രേംരാജ് ബൂട്ടണിഞ്ഞു, സ്വപ്ന ടീമായ മുംബൈ ഓര്‍ക്കെ മില്‍സിലും കളിച്ച പ്രേംരാജ് ഇതിനിടെ ഇന്ത്യന്‍ ജൂനിയര്‍ ടീമിലുമെത്തി. ജീവശ്വാസമായി ഫുട്‌ബോള്‍ കൊണ്ടുനടന്നൊരു കാലത്ത് തന്നെ ജന്മനാട്ടില്‍ തിരിച്ചെത്തി. 2002ല്‍. പരിശീലകനായും വെറ്ററന്‍സ് ടീമിലും സജീവമായിരിക്കെ കാലിലെ രോഗം തളര്‍ത്തി. വാടകവീട്ടില്‍ നിന്നിറങ്ങി, മരുന്നിന് പോലും വകയില്ലതായതോടെ തലശേരിയിലെ സുഹൃത്തുക്കള്‍ സമിറിറ്റന്‍സ് ഹോമിലെത്തിച്ചു.കഴിഞ്ഞ കുറച്ചു കാലമായി സ്വന്തം കുടുംബവുമായി ബന്ധപ്പെടാന്‍ ആയിട്ടില്ല. കാണണമെന്നാഗ്രഹമുണ്ട്. അഗതിമന്ദിരത്തില്‍ ഒപ്പം ഒരുപാട് പേരുണ്ടെന്ന സന്തോഷത്തിലാണ് അതിജീവനം. ഒരു കാലത്തെ ത്രസിപ്പിച്ച പന്ത് കളിക്കാരന്റെ പ്രതീക്ഷ മാത്രം കൈമുതലായുളള വാര്‍ധക്യം. പന്തു തട്ടുന്നൊരാളെ കാണാന്‍ കോടികള്‍ ചെലവഴിക്കുന്ന ഈ നാട്ടിലെ സംവിധാനങ്ങള്‍ ഈ കളിക്കാരനെയും ഒന്ന് പരിഗണിക്കണം, പറ്റുമെങ്കില്‍ കൈത്താങ്ങാകണം.
Sun, Nov 30, 2025
Views and Perspectives
