രാഹുല്‍ വിഷയത്തില്‍ നിലപാട് മയപ്പെടുത്തി കെ. മുരളീധരന്‍
തിരുവനന്തപുരം: ലൈംഗീക പീഡന ആരോപണത്തില്‍ രാഹുല്‍ മാങ്കൂട്ടത്തില്‍ എം.എല്‍.എ സ്ഥാനം രാജിവെക്കേണ്ടതാണെന്ന മുന്‍നിലപാട് മയപ്പെടുത്തി കോണ്‍ഗ്രസ് നേതാവ് കെ. മുരളീധരന്‍. ആര്‍ക്കും ആരെക്കുറിച്ചും മുന്‍കൂട്ടി ധാരണയ്ക്കുള്ള സാധ്യതകളില്ലെന്നും പലര്‍ക്കുമുള്ള പല അസുഖങ്ങള്‍ എങ്ങനെയാണ് നമുക്ക് മനസ്സിലാക്കാന്‍ കഴിയുകയെന്നും അദ്ദേഹം ചോദിച്ചു. അതൊക്കെ ഈ രോഗം പുറത്തുവരുമ്പോഴല്ലേ അറിയൂ എന്നും മുരളീധരന്‍ പറഞ്ഞു.
കുറ്റാരോപിതനെ രക്ഷിക്കുന്ന സമീപനം സ്വീകരിക്കില്ല. അതേസമയം, കാര്യങ്ങള്‍ ബോധ്യപ്പെടുകയും വേണം. ഇതുവരെ ആരും പരാതി ഔദ്യോഗികമായി നല്‍കിയിട്ടില്ല. എന്നാല്‍, പോലീസിനെ സംബന്ധിച്ച്, അവര്‍ക്ക് ഇതിന്റെ അടിസ്ഥാനത്തില്‍ അന്വേഷിക്കാം. ഏതായാലും പാര്‍ട്ടി ഇക്കാര്യം വളരെ ഗൗരവത്തോടെ കാണുന്നുണ്ട്. എല്ലാ കാര്യങ്ങളേക്കുറിച്ചും ആലോചിച്ച് പാര്‍ട്ടി നടപടി സ്വീകരിക്കും, അദ്ദേഹം തിരുവനന്തപുരത്ത് മാധ്യമങ്ങളോടു പറഞ്ഞു.
രാഹുലിന് സ്ഥാനാര്‍ഥിത്വം നല്‍കിയതിലൂടെ കഴിഞ്ഞ തിരഞ്ഞെടുപ്പില്‍ പാര്‍ട്ടി ഒരു വിശാലമായ സമീപനം സ്വീകരിക്കുകയായിരുന്നെന്നും മുരളീധരന്‍ പറഞ്ഞു. നല്ലൊരു ചെറുപ്പക്കാരനാണ്, ഭാവിയുള്ള ആളാണ്. അങ്ങനെയുള്ള വ്യക്തിയെ നിയമസഭയിലെത്തിക്കണമെന്നത് പാര്‍ട്ടിയുടെ വികാരമായിരുന്നു. അത് അനുസരിച്ചാണ് പാര്‍ട്ടി അന്ന് ആ തീരുമാനമെടുത്തത്. അതില്‍ ഭയക്കേണ്ട കാര്യമില്ല. ഇവിടെ ബിജെപിയുടെ എംഎല്‍എ വേണമെന്ന് എല്‍ഡിഎഫിന് നിര്‍ബന്ധമില്ലെങ്കില്‍ ബിജെപി ജയിക്കാന്‍ പോകുന്നില്ല. ഇനി തിരഞ്ഞെടുപ്പിന്റെ ആവശ്യമുണ്ടോയെന്ന് ചിന്തിക്കണം. ഇതുപോലത്തെ വിഷയങ്ങള്‍ എങ്ങനെയാണ് മുന്‍കൂട്ടി കാണാന്‍ കഴിയുക. ആര് എവിടൊക്കെ മതിലുചാടുന്നുവെന്ന് ആര്‍ക്കാണ് അറിയുകയെന്നും മുരളീധരന്‍ ചോദിച്ചു.